TAGBILARAN CITY, Bohol, Mar. 20 (PIA)–Gitun-an pa sa Malakanyang ang pagkuha og serbisyo sa international law firm kalabot sa pag-angkon sa Sabah.
Matud pa ni Presidential Spokesperson Edwin Lacierda, una nang gitahasan silang Executive Secretary Paquito “Jojo” Ochoa Jr., Justice Sec. Leila De Lima ug Foreign Affairs Sec. Albert Del Rosario nga tutokan ang maong isyu.
Kun mahuman na ang pagsusi sa isyu sa tulo ka opisyal, desisyunan nila kun kinahanglan pang mokuha og serbisyo sa international law firm.
Gibutyag ni Lacierda nga dugay na sila nikuha og international lawyers alang sa gi-angkon sa Pilipinas sa West Philippine Sea o South China Sea.
Samtang dili uyon ang Malakanyang sa planong pagduol sa Association of Southeast Asian Nations (ASEAN) kalabot sa giingong pag-abuso sa mga Pinoy sa Sabah tungod kay giingong wala pa nahuman ang pagtuon niini sa Department of Social Welfare and Development (DSWD). (PIA-Bohol/ecb/i-gg)
2012 Infra spending, nisaka sa 58%
TAGBILARAN CITY, Bohol, Mar. 20 (PIA)–Gikumpirmar karon sa Department of Budget and Management (DBM) nga misaka sa 57.7 porsiyento ang infrastructure ug capital spending sa administrasyon.
Niadtong 2012, nakagasto ang gobyerno og taman P250.8 bilyon gikan sa kanhi expenditures nga P91.7 bilyon niadtong 2011.
Matud pa ni Budget and Management Sec. Florencio Abad, gipakita sa maong mga figures ang pagpursige sa administrasyon aron pondohan ang mga gikinahanglang imprastruktura nga angay suporta sa gitawag nga long-term growth strategy.
Sigun pa kang Abad, gilauman nilang mas modaghan pa ang mga mosulod nga investments sa nasud tungod sa maong pasilidad.
“Last year’s spending levels will buoy our growth strategy this year as we look forward to pouring more investments into infrastructure and capital outlay in 2013. The development of roads and bridges, for example—as well as ongoing initiatives to increase access to tourism hotspots and improve irrigation facilities—will help generate jobs and create thriving markets for local industries,” matud pa ni Abad.
Gawas sa infrastructure spending, kauban usab sa highlight sa paggastos niadtong 2012 ang gigahin sa Personnel Services (PS) nga tnisaka sa P42.2 bilyon o 8.4 ug Interest Payments (IP) nga naa sa P312.8 bilyon. (PIA-Bohol/ecb/ied)
