TAGBILARAN CITY, Bohol, Feb. 15 (PIA)–GI-aprubahan na sa Commission on Elections (Comelec) ang resolusyon nga nagtugot sa media absentee voting nga ipahigayon sulod sa tulo ka adlaw.
Base sa Comelec Resolution 9637, mahimo nang mobotar ang mga miyembro sa media sa regional election office kun sila nakabase sa National Capital Region (NCR), sa office of the city election officer kun naa sa highly-urbanized ug independent cities, ug sa provincial election office kun sa mga taga-lalawigan.
Nakalatid sa 14 ka pahinang kamanduan nga gitakda ang pagbotar sa mga miyembro sa media sa Abril 28, 29 ug 30, 2013 dungan sa uban pang local absentee voting sama sa Philippine National Police (PNP) ug Armed Forces of the Philippines (AFP).
Kinahanglan lamang nga moduso ang media og aplikasyon hangtud sa Marso 31 aron makabotar. Sugdan kini sa alas-8:00 sa buntag hangtud sa alas-5:00 sa hapon ubos sa pagdumala sa mga lokal nga opisyal sa Comelec.
Giingong halos susama lamang sa daang sumbanan sa local absentee voting ang ipatuman sa pagbotar sa mga mamamahayag.
Kadtong mga rehistradong media lamang niadtong niaging registration period ang mahatagan og kahigayonang makasalmot sa piniliay. (PIA-Bohol/ecb/i-gg)
Comelec, dili na mopahigayon og mock polls
TAGBILARAN CITY, Bohol, Feb. 15 (PIA)–WALA nay ipahigayon nga mock polls human migawas ang report sa Technical Evaluation Committee (TEC) nga nag-ingong kuntento sila sa mock polls nga gipahigayon niadtong Pebrero 2.
Matud pa ni Comelec Chairman Sixto Brillantes, Jr., kuntento ang TEC sa gipahigayong mock elections ug naayo na usab ang tanang minor glitches o mga gagmay’ng aberya nga nahitabo kaniadto.
Ang TEC gilangkoban sa mga eksperto gikan sa Department of Science and Technology (DOST), usa ka independent IT group, ug usa usab gikan sa Comelec.
Giingong katuyuan sa maong mock elections nga matumbok ang mga sayop ug nasulban raman kini nila dayon.
Gidugang pa usab ni Brillantes nga dili na usab madala pa sa ilang iskedyul ug budget ang pagpahigayon og lain pang mock elections sa dili pa ang piniliay sa Mayo 13.
Apan mopahigayon ang Comelec og nationwide final testing sa tanang precinct count optical scan (PCOS) machines usa ka semana sa dili pa ang piniliay. (PIA-Bohol/ecb/i-gg)
