TAGBILARAN CITY, Bohol, June 13 (PIA)–Gi-alerto karon ni Presidente Benigno Aquino III ang nagkalain-laing ahensya sa gobyerno kalabot sa padayon nga pag-ulan sa Mindanao nga maoy nagdala sa mga pagbaha.
Matud pa ni Deputy Presidential Spokesperson Abigail Valte, gipalihok na sa Presidente ang
mga hingtungdan nga mga opisyal aron makapangandam ug maatiman ang mga panginahanglan sa mga residente.
Dugang pa ni Valte, padayon ang ilang monitoring sa mga gibahang lugar ug mga aksyong gihimo sa gobyerno.
Una sa gitahasan ang National Disaster Risk Reduction Management Council (NDRRMC) nga tutukan ang mga posibleng pagdahili sa yuta.
Gibutyag usab ni Valte nga ‘all-set’ na usab ang DSWD ug mga LGUs aron mangapud-apod sa mga relief goods nga kinahanglanon sa mga ibakwit nga mga residente. (PIA-Bohol/ecb)
Palasyo, nagtinguha sa P2 trilyong budget sa 2013
TAGBILARAN CITY, Bohol, June 13 (PIA)–Gi-plantsa na karon sa Malacañang ang balaodnon nga national budget alang sa sunod tuig nga gilauman nga mokabat sa P2 trilyon, 10-porsyentong mas daku kini gikan sa kasamtangang budget nga P1.8 trilyon.
Matud pa ni Budget Secretary Butch Abad nga ang pagdaku sa budget makatabang usab sa gobyerno nga mapatuman ang mga proyekto sama sa mga infrastructure ug paspas nga paghatag sa pondo alang sa mga public private partnership (PPP) projects sa gobyerno.
Giingong makatabang usab kini sa social services sa gobyerno sama sa conditional cash transfer program.
Target usab nila nga sa dili pa matapos ang 2013, masulbad na ang kakulang sa mga classrooms nga 65,000 gawas sa dugang 25,000 pang mga classrooms nga ipatukod sa sunod tuig ug 63,000 nga mga bag-ong magtutudlo.
Ang rural electrification, irrigation, roads ug bridges giingong apil usab sa mga nakalinyang tapuson sa tuig 2014.
Kasagaran isumite sa Presidente ang tinuig nga proposed budget sa Kongreso paghuman sa iyang State of the Nation Address (SONA). (PIA-Bohol/ecb)
