TAGBILARAN CITY, Bohol, April 10 (PIA)–Nipasidaan pagbalik ang Department of Health (DOH) sa publiko nga mag-amping atubangan sa nasinating init nga panahon.
Gi-monitor na usab sa DOH ang temperatura matag adlaw agig pagbantay sa heat wave.
Pasabot ni Dr. Eric Tayag, tigpamaba sa DOH, “Kapag tatlong araw na tumama sa 37 degrees (celsius), magkakaraoon tayo ng heatwave.”
Mao nga tambag sa DOH, mo-inom og 13 ka baso nga tubig matag adlaw.
Giingong dili angay pasagdan nga ang pagkauhaw ang mahimong timaan aron mo-inom og tubig. Kinahanglang mag-ihap og 13 ka baso nga tubig aron mahimong bugnaw ang pamati.
Matud pa ni Tayag, ang dehydration o ang pagkahurot sa tubig sa lawas ang mahimong hinungdan sa heat stroke, nga mahimo usab nga ikamatay.
Likayan ang pag-inom og tsaa, kape ug ilimnong makahubog nga mahimong hinungdan sa dehydration.
Likayan usab ang pagbuwad sa adlaw gikan alas-9:00 sa buntag hangtud alas-3:00 sa hapon.
Tambag ni Tayag, magpabilin na lamang sa ilang mga panimalay kun walay importanteng lakaw.
Sa mga nag-exercise, mas maayo kun mas sayo nila kining himuon tungod kay kun idungan kini sa init sa panahon, doble-kahago ang epekto niini.
Mas maayo usab nga puti o light ang kolor nga isul-ob tungod kay mas mapagawas niini ang init sa lawas kun itandi sa mga may kolor nga besti.
Pipila sa mga sintomas sa heat stroke ang pagkalipong, katol nga panit, taas nga temperatura ug pagkawala sa panimuot. (PIA-Bohol/ecb/i-hd)
