MANILA, Aug. 06 (PIA)–Bawal nang mosakay sa mga motorsiklo ang mga bata human gilagdaan na ni Presidente Benigno ‘Noynoy’ Aquino III ang balaod kalabot niini.
Base sa Republic Act No. 10666 nga gilagdaan ni PNoy niadtong Hulyo 21, 2015 apan gahapon lamang gipagawas sa Malakanyang, gibawal na sa bisan kinsang magmaneho sa 2-wheeled motorcycle nga adunay angkas nga bata ug moagi sa pampublikong kadalanan nga daghang mo-agi nga sakyanan o may moaging paspas og dagan nga mga sakyanan.
Ang maong balaod nga gitawag og ‘Children’s Safety on Motorcycles Act of 2015’, nakalatid nga mahimo lamang mo-angkas ang bata kun maabot niini ang ‘foot peg’ sa motorsiklo, kun makagakos na sa driver ug kun magsul-ob og standard protective helmet.
Exempted niining balaod ang pag-angkas sa bata sa motorsiklo nga kinahanglang dalhon dayon sa tambalanan o ospital.
Ang driver nga molapas sa maong balaod pahamtangan og multang P3,000 sa unang offense, P5,000 sa second offense ug P10,000 sa third ug succeeding offenses, gawas pa sa pagsuspinde sa drivers license sulod sa usa ka bulan.
Kun badlongon gayud ang driver ug naka-upat na nga violation sa maong balaod, automatic revocation o pagkumpiska sa drivers license ang ipahamtang nga silot.
Ang gilagdaang balaodnon mao ang gihiusang bersyon sa Senado ug Kamara.
Si Sen. Vicente Sotto III sa Senado ang nagsulat ug nag-sponsor sa Senate Bill 2488 samtang ang bersyon usab sa Ubos Balay Balaoranan gisugyot ni Antipolo City Rep. Romeo Acop ubos sa giduso niining House Bill 3554 nga ang tuyo mao ang pagduso sa public safety ug ma-protektahan ang mga bata gikan sa peligro sa kadalanan. (ecb/PIA7-Bohol)
