MANILA, Nov. 18 (PIA)–Pormal nang gilusad ganina sa Malakanyang ang Foreign Aid Transparency Hub (FAiTH) aron masiguro nga magamit og sakto ang mga foreign donation nga nadawat sa Pilipinas alang sa mga biktima sa bagyong “Yolanda”.
Ang FAiTH usa ka online portal sa mga impormasyon kalabot sa calamity aid ug assistance, cash man o in-kind gikan sa mga foreign countries ug nagkalain-laing organisasyon.
Gawas kun pila ug diin gikan, makita usab sa website ang gigastohan o paggamit sa maong mga donasyon.
“Ultimately, FAiTH is more than a hub of information. It is an expression of appreciation for the kindness of those who stand in solidarity with our countrymen, and it is a continuation of our promise to the Filipino people: we are here only to serve you,” matud pa ni Presidente Benigno ‘Noynoy’ Aquino III sa pahayag nga gibasa ni Presidential Spokesperson Edwin Lacierda.
Gawas sa transparency, tinguha usab sa FAiTH nga ipakita ang pag-ila ug pagpasalamat sa tabang sa mga foreign donors ug parte sa saad nga pag-alagad sa katawhan.
Gitumbok usab sa Presidente nga parte lamang kini sa tubag sa gobyerno sa mga naapektuhan sa bagyo samtang tabangan silang makabangon gikan sa trahedya ug makapabarug sa mga nagubang komunidad ug mga imprastraktura nga maoy unang himuon.
Ang pagbantay sa mga foreign aid pagadumalaon sa FAiTH Team nga gilangkoban sa mga tinugyanan sa Department of Foreign Affairs, Department of Budget and Management, Department of Finance, Department of Social Welfare and Development, Commission on Audit, National Disaster Risk Reduction and Management Council, Presidential Management Staff ug Office of the Presidential Spokesperson-Presidential Communications Development and Strategic Planning Office. (PIA7-Bohol/ECB)
