MANILA, Feb. 12 (PIA)–Nipasidaan ang Philippine Health Insurance Corp. (PhilHealth) nga ilang pamultahon ang mga pampublikong tambalanan nga maningil og professional fee ug bayad sa mga tambal sa indigent patients o kabus nga pasyente.
Sa pagdungog kagahapon sa Senate Committee on Health and Demography kalabot sa Universal Health Care ug sa National Health Insurance Program sa gobyerno, miingon si Atty. Alex Padilla, presidente ug executive chief officer sa PhilHealth nga bawal ang pagpaningil sa mga kabus nga pas¬yente agig pagsunod sa “no balance billing system”.
Miingon si Padilla nga ubos sa “no billing system”, dili angay magbayad bisan usa ka sentimo ang mga kabus nga pasyente kun magpatambal kini.
“Ang ibig sabihin ng no balance billing ay wala ho siya (pasyente) dapat binabayaran ni singko for medicines, professional fees or kaya diagnostic. Wala ho siyang dapat gastos,” pasabot ni Padilla sa pagdungog sa Senate committee on health kagahapon.
Giingong sa mismong adlaw sa admission sa pasyente, wala kini angay nga gastohon.
Kun walay available nga tambal nga magamit ang pasyente, mismong ang ospital ang angay mopalit niini o angay hatagan og kwarta ang pasyente aron ipalit og tambal.
“Ang patakaran ho ang hospital ang bibili ng gamot or magbigay ng pera sa pasyente para magbigay ng gamot. Pero hindi po dapat gumagastos ng sarili ang pasyente,” dugang pa niini.
Apan gitataw ni Padilla nga ang “no billing system” alang lamang sa mga kabus nga pasyente nga nagpatambal sa mga government hospitals ubos sa ward conditions. (PIA7-Bohol/ECB)
