TAGBILARAN CITY, May 03 (PIA)–Adunay bag-ong Loan Restructuring Program ang Social Security System (SSS) aron tabangan ang mga naapektuhan sa kalamidad.
Ubos niining bag-ong programa, mahimong bayran sa miyembro nga naapektuhan sa kalamidad ang principal ug interes sa ilang utang pinaagi sa installment ug full payment.
Human mabayran ang principal ug interes sa utang, mahimo nang matanggal ang penalty.
Usa sa mga tuyo sa Loan Restructuring Program nga mabalik sa good standing ang status sa usa ka miyembro ug makuha og bulto ang ilang mga benepisyo.
Mahimong mopaubos niining programa ang mga naapektuhan sa niaging bagyo ug kalamidad nga: Ondoy, Sendong, Pedring, Quiel, Pablo, Labuyo, Maring, Santi, Zamboanga City armed conflict, linog sa Bohol ug Cebu, Yolanda, Agaton, Glenda, Mario, Senyang, Lando, Ruby, ug Nona.
Kinahanglan lamang sa miyembro nga buot mopaubos niining programa og affidavit of residency nga pagmatuod nga sila nagpuyo o nagtarabaho sa lugar nga nadeklara og National Disaster Risk Reduction and Management Council (NDRRMC) nga naapektuhan sa maong mga kalamidad.
Gipasabot sa SSS Assistant Vice President for Member Loans, Boobie Angela Ocay nga dili lamang calamity loans ang mahimong bayran ubos sa Loan Restructuring Program.
Nahisulod usab niini ang salary loan, salary loan early renewal program (SLERP), emergency loan, voc-tech loan, Y2K loan, investments incentive loan, “study now, pay later” plan, ug educational loan nga ni-due na sa nakalabay nga unom ka buwan.
Samtang dili pa mabayran og bulto ang utang nga gipaubos sa Loan Restructuring Program, dili mahimong makakuha og bisan unsang loan ang usa ka miyembro.
Usa usab sa mga tuyo nga maabot sa Loan Restructuring Program mao ang mga mag-pension apan dili kini makuha tungod kay naa pa sila’y utang nga wala pa nabayran.
Ang Loan Restructuring Program sa SSS gipatuman sugod niadtong Abril 28 ning tuig hangtud Abril 27 sa sunod tuig. (ecb/PIA7-Bohol)
