TAGBILARAN CITY, Bohol, Feb. 21 (PIA)–Mga klase sa mga eskwelahan lamang ang suspendido sa adlaw sa pagsaulog sa ika-28 anibersaryo sa People Power Revolution sa Martes, Pebrero 25.
Adunay trabaho ang mga buhatan sa gobyerno ug sa mga pribadong kumpanya sa maong adlaw.
Samtang, gitakdang moduaw sa Cebu si Presidente Benigno ‘Noynoy’ Aquino III aron isaulog ang EDSA day kauban ang mga naapektuhan sa mga niaging kalamidad.
Una nang gibutyag sa Palasyo nga apil sa bisitahon sa Presidente agig pagsaulog sa EDSA People Power Revolution sa sunod semana ang Cateel, Davao Oriental alang sa rehabilitasyon sa bagyong Pablo, Eastern Samar tungod sa bagyong Yolanda ug ang linog sa Bohol.
“The President said it was important to rally people in areas affected by calamities in order to rekindle the spirit of EDSA People Power in rebuilding better communities. Hence the original plan to hold the event in Malacañang was shelved,” pasabot pa ni Presidential Communications Operations Office (PCOO) chief Herminio Coloma, Jr. (PIA7-Bohol/ECB)
