GAWAS sa pagkaon sa mga seaweeds nga puno sa iodine, gitambagan sa usa ka
toxicologist ang mga Pinoy sa pag-inom og mga oral detoxifying agents, mokaon og mga
prutas ug utanon ug mga anti-radiation herbs aron pagbatok kun moabot sa nasud ang
radiation nga naggikan sa Fukushima Daiichi nuclear power plant sa Japan.
Matud pa ni Dr. Romeo Quijano, professor sa Department of Pharmacology and Toxicology
sa University of the Philippines, Manila, mahinungdanon ang himsog ang panglawas nga
makuha pinaagi sa healthy lifestyles.
Isip precautionary ug migation measures, niingon si Quijano nga mahinungdanon ang
pagkaon sa mga dili kontaminadong seaweeds, prutas ug utanon nga mga anti-oxidants.
Nagpahigayon niadtong Miyerkoles ang Senate Committee on Health and Demography
kalabot sa posibleng mahimong epekto sa mga Pilipino sa radiation exposure gikan sa planta
sa Japan.
Giingong apil sa mga prutas ug utanon nga puno sa antioxidants ang berries, bayabas,
guyabano, bignay, soy bean, saluyot, alugbati, beets, spiriluna ug uban pa.
Gikonsidera usab nga anti-radiation herbs ang Turmeric o luy-ang duwaw, roselle, Angelica
sinensis (Dang Gui), Tinospora (makabuhay), ginseng, green tea, Ganoderma, ug Bupleurum
chinense.
Gitambagan usab ni Quijano ang mga Pilipino nga magpabilin sulod sa ilang mga panimalay
kun adunay radioactive fallouts ug likayan ang pag-inom og tubig-uwan o rainwater ug ang
paggamit niini sulod sa panimalay. (ecbPIABohol)
