TAGBILARAN CITY, Bohol, July 09 (PIA)–Nipasidaan ang Philippine Overseas and Employment Administration (POEA) sa mga Pinoy nurse sa pagpangita og trabaho tungod sa mga fixer nga nagtanyag og assistance ug facilitation sa posibleng trabaho sa Germany.
Matud pa ni POEA Chief Hans Cacdac, nakadawat sila og impromasyon nga adunay mga fixer nga nisaad sa ilang mga aplikante nga i-apil ang ilang pangalan sa listahang isumite sa Germany bugti sa salaping ibayad.
Dugang pa ni Cacdac, ang mga illegal recruiter, scammer ug fixer kasagarang pahimoslan ang publicized overseas employment opportunities sama sa Employment Permit System sa Korea, JPEPA nurses ug caregivers sa Japan ug karon ang Germany’s Triple Win Program.
Gitataw ni Cacdac nga ang mga aplikante pilion base sa ilang kwalipikasyon ug dili sa salapi.
Giingong ang Federal Employment Agency (BA) pinaagi sa International Placement Services (ZAV), usa ka awtorisadong ahensya nga nag-recruit og mga Pinoy health professionals ubos sa German law, ang katapusang magdesisyon sa pagpili sa mga aplikante.
Ni-abiso usab si Cacdac sa mga nangita og trabaho sa ubang nasud nga mahimong i-report sa ilang buhatan ang mga “fixer” ilabi na kun nahilambigit ang mga empleyado sa POEA.
Mahimong motawag sa mga numerong 722-1144 ug 722-1155, mag-email sa info@poea.gov.ph o motaho sa ilang Facebook: facebook.com/poea.official ug Twitter: twitter.com/poeaNews. (PIA-Bohol/ecb)
