TAGBILARAN CITY, Bohol, Aug. 14 (PIA)–Ipagawas na sa Land Transportation Office (LTO) ang mga plakang adunay mga bag-ong security features karong Setyembre.
Matud pa sa tigpamaba sa LTO nga si Jason Salvador, nipahibalo na ang Department of Transportation and Communication (DOTC) sa pagpagawas sa mas modernong mga plaka nga adunay mga bag-ong security features ug alpha numeric design.
Alang sa mga motor vehicles, mahimong tulo ka letra ug upat ka numero na ang kombinasyon sa plaka sugod sa Setyembre.
Samtang kombinasyon usab sa duha ka letra ug lima ka numero ang plakang ipagawas alang sa mga motorsiklo.
Mahimong kolor itom ug puti na ang desenyo sa mga plaka alang sa mga pangpribadong sakyanan.
Aduna usab naka-laser nga bar code nga hinimo sa reflective shading materials ang mga bag-ong plaka.
May vault head screw ug knots nga adunay serial numbers usab ang mga bag-ong plaka aron dili ma-tamper ug matangtang gikan sa mga sasakyan.
Una nang gihatag ang lima ka tuig nga kontrata sa joint venture nga JKG ug Power Plates Development Concepts Inc. alang sa suplay sa motor vehicle ug motorcycle license plate sa kantidad nga P1.989 bilyon ug P1.986 bilyon. (PIA-Bohol/ecb)
Gobyerno sa Taiwan, nagpagawas og bag-ong sumbanan
alang sa mga Pinoy nga gustong mo-apply sa ilang nasud
TAGBILARAN CITY, Bohol, Aug. 14 (PIA)–Nagpagawas og bag-ong hiring guidelines ug requirements ang gobyerno sa Taiwan alang sa mga Pinoy workers nga gustong mo-trabaho sa ilang nasud.
Alang sa visa application, kinahanglan ang unified multi-purpose ID nga i-isyo sa gobyerno sa Pilipinas, NSO-certified copy sa birth certificate ug clearance gikan sa National Bureau of Investigation (NBI).
Matud pa sa Taipei Economic and Cultural Office (TECO), sakop usab niining sumbanan ang mga work permit-applications alang sa mga blue-collar workers, first time applications, substitutes ug re-hiring.
Gipaabot nga mokabat lamang og unom ka adlaw ang kinatibuk-ang pag-proseso sa maong mga dokumento. (PIA-Bohol/ecb)
