WALA pa may risgo sa Mexical swine flu ang Pilipinas, wala magpatuyang ang mga tinugyanan sa nasud aron kapugngan ang paghasi niini.
Suspindido na sa Department of Agriculture ang tanang produkto gikan sa baboy nga naggikan sa mga nasud nga kmpirmadong apektado sa sakit samtang gimandu na ni Sec. Yap ang pagpalig-on sa serbisyong kwarantina sa mga pantalan ug tugpahahan aron pugngan ang pagsulod sa mga posibleng makadala sa kagaw dinhi.
Gipalihok na usab sa Department of Health, taho ni Secretary Francisco Duque III, ang iyang mekanismo sa surveillance ilabi na ang pagsusi sa mga pasaherong mosulod sa nasud human gi-butyag sa WHO ang pahimangno batok sa Mexican swine influenza.
Ang pasaherong mamatikdang may hilanat ilain ug dalhon derecho aron tambalan sa Research Institute for Tropical Medicine, sa San Lazaro Hospital o sa Lung Center of the Philippines.
Timailhan sa nahisgutang sakit sa tawo mao ang: hilanat, kakapoy, kakulang sa gana mokaon, pag-ubo, sip-on, sore throat, pagkalipong, kalibanga ug pagsuka-suka. (rachiu/PIA)
