TAGBILARAN CITY, Bohol, May 10 (PIA)—Gipahunong karon sa Supreme Court (SC) ang kontrobersyal nga money ban resolution sa Commission on Elections (Comelec) human kini nipagawas og status quo ante order agig pabor sa hangyo sa Bankers Association of the Philippines (BAP).
Ang maong kamanduan gi-anunsyo sa tigpamaba sa SC nga si Atty Theodore Te ug nagpasabot kini nga angay magpabilin pa gihapon ang kanhi gipatuman nga balaod sa wala pa gipagawas ang Comelec resolution 9688.
Base sa “petition for prohibition” nga giduso sa BAP, gihangyo niini nga magpagawas ang SC og temporary restraining order (TRO) o status quo ante order aron pugngan ang pagpatuman sa maong resolusyon.
Gihangyo usab sa petisyuner nga ipabasura ang gi-kwestiyong kamanduan tungod kay giingong milapas kini sa Konstitusyon.
Una nang gitumbok ni Lorenzo Tan, presidente sa BAP, nga mahimong makaapekto ang maong resolusyon sa Comelec sa mga transaksyon sa bangko.
Sa duha ka pahinang resolusyon sa SC, gipangayuan og komento ang Comelec sa petisyong giduso sa BAP sulod sa 10 ka adlaw.
Ubos sa Comelec resolution 9688, gidili sa poll body ang pag-withdraw og salapi nga kapin sa P100,000 matag adlaw ug ang pag-byahe og P500,000 nga cash gikan Mayo 8 hangtud 13. (PIA-Bohol/ecb)
