MANILA, Feb. 12 (PIA)–Karong bulan sa Pebrero, gawas sa pagsaulog sa Valentine’s Day sa tibuok kalibotan, isaulog usab ang National Arts Month sa nasud.
Sa panguna ni National Commission for Culture and the Arts (NCCA), ang Philippine Arts Festival karong tuig adunay tema nga: “Art on the Edge.”
Nagtinguhang i-highlight karong tuig ang kamaayo sa mga Pinoy sa nagkalain-laing larangan sa arte ug kultura sama sa architecture, cinema, dance, literature, music, theater ug visual arts.
Sa pakig-tambayayong sa nagkalain-laing pribadong sektor ug buhatan sa gobyerno, daghang nakaandam nga mga workshops, exhibits, forums, mga pasundayag ug uban pa sama na lamang sa gipaabot nga Second Likha Asya Festival and Conference.
Gikan sa kaulohan, ipasundayag na ang mga programa sa NCCA Philippine Arts Festival sa nagkalain-laing dapit sa Pilipinas.
Gani, gipahigayon ang opening ceremony niini niadtong katapusang adlaw sa Enero sa syudad sa Roxas, sa Capiz.
Gihatagan og pasidungog ang mga Filipino artists nga nakadawat usab og pag-ila sa mga international awards sa gipahigayong Ani ng Dangal awarding ceremony niadtong Pebrero 2.
Alang sa kumpletong detalye ug petsa sa mga pasundayag sa Philippine Arts Festival 2014, mahimong bisitahon lamang ang ilang website sa www.ncca.gov.ph.
Sa pagpakita og pagbaton og maayong abilidad sa mga Pinoy sa arte ug kultura, mahimo kining usa ka dalan aron makab-ot ang tinguhang mapasaka pa ang industriya sa turismo sa atong nasud. (PIA7-Bohol/ECB)
