TAGBILARAN CITY, July 15 (PIA)–Pormal nang ni-asumir ni Senior Supt. Felipe Natividad isip bag-ong provincial director sa Bohol Provincial Police Office (BPPO) kagahapon.
Atol sa turnover ceremony kagahapon sa Kampo Dagohoy ning syudad, si Natividad miingon nga dakong hagit kaniya ang mga nahimo ni kanhi BPPO director Senior Supt. Dennis Agustin ilabi na sa operasyon sa pakigbugno batok sa kalihokan sa ilegal nga droga sa lalawigan ug plano niya kining ipadayon ug hingosgan pa.
Ang pagdawat sa command ni Natividad gikan kang Agustin, gipangunahan ni Police Regional Office (PRO-7) Director Chief Supt. Noli Taliño.
Sa gipahigayong programa sa turnover ceremony, si Agustin gipasidunggan sa PRO-7 sa Medalya ng Kasanayan o Philippine National Police Efficiency Medal.
Ang maong medalya gihatag kang Agustin tungod sa iyang pagkugi human sa magnitude 7.2 nga linog nga nitay-og sa Bohol niadtong 2013, sa pagmintinar sa kalinaw ug kahapsay sa niaging eleksyon ug pakigbugno batok sa kalihokan sa ilegal nga droga sa lalawigan.
Samtang laing pasidungog usab ang gihatag kang Agustin sa kagamhanang probinsiyal sa Bohol tungod sa iyang kontribusyon sa lalawigan.
Si Agustin kinsa mao na nga Directorial Staff chief sa PRO-7 karon, gihatagan usab og plake sa Bohol Chamber of Commerce and Industry ug sa Philippine Army’s 302ndInfantry Brigade.
Ang maong turnover ceremony gitambongan nila Gob. Edgar Chatto, Vice Gob Dionisio Balite, 302nd Infantry Brigade commander Col. Arnulfo Matanguihan, ubang opisyal sa gobyerno ug mga police chief sa kalungsoran sa Bohol. (ecb/PIA7-Bohol)
