TAGBILARAN CITY, Bohol, Sept. 21 (PIA)–Magbaton na og service firearm ang matag usa sa 147,000 ka puwersa sa Philippine National Police (PNP) human gilagdaan na ni PNP Chief Director General Nicanor Bartolome ang procurement contract alang sa P1.98 bilyong gun deal.
Gahapon gilagdaan ni Bartolome ang kontrata sa ahensya sa kumpanyang Trust Trade/Glock Asia sa pagpalit og kapin sa 60,000 ka glock pistol sa kapulisan.
Moabot ang unang batch sa mga armas sa Pebrero 2013 nga sundan usab human molabay ang matag 120 calendars days.
Gikonsiderar nga pinakadakung procurement sa kasaysayan sa PNP ang maong gun deal.
Nasayran nga ang Trust Trade/Glock Asia ang ikaduhang may pinaka-ubos og presyo sa mga armas sa mga nag-bidding nga supplier nga mokabat lamang sa P16,659.94 matag usa ka Glock 17 pistol diin nakapasar usab kini sa 20,000 rounds endurance test aron masiguro nga lig-on ang maong armas alang sa mga pulis.
Samtang gipahayag usab sa PNP Chief nga i-iskedyul na ang pagpahigayon og bidding alang sa tag-as nga armas nga magamit usab sa maneuver force sa PNP o ang Special Action Force (SAF).
Giingong gikonsulta una ni Bartolome ang PNP Legal Service kalabot niining maong transaksyon sa wala pa kini pirmahi. Kini human sa mga kontrobersyang gilambigitan sa kumpanya ug sa transaksyon. (PIA-Bohol/ecb/I-gg)
Comelec, may pahinumdom sa mga mokandidato sa 2013 elections
TAGBILARAN CITY, Bohol, Sept. 21 (PIA)–Nanawagan si Commision on Elections (Comelec) Chairman Sixto Brillantes Jr. sa mga mokandidato sa 2013 nga basahon ug tubagon og iksakto ang ilang certificate of candidacy (COC).
Kini tungod kay bag-o na ang format sa COC kun itandi niadtong 2010 elections.
Giingong labing importante sa mga tubagon sa COC ang pagpili sa gamitong pangalan sa kandidato nga isuwat sa balota.
