ANG gipaabot nga pagpasaka sa sertipiko sa mga kandidato alang sa Sangguniang Barangay ug Sangguniang Kabataan nga piniliay magsugod na gyud sa Biyernes, human sa 45 ka adlaw nga election period nga nagsugod niadtong Sabado ug motapos sa Nobyembre 10.
Matud pa ni Comelec Provincial Supervisor Eliseo Labaria nga ang ilang buhatan andam nang modawat sa certificates of candidacy (COCs) sa mga molansar nga mo okupa sa 768 ka posisyon sa barangay ug SK, nga adunay barangay/SK chairman ug pito ka kagawad sa kada barangay.
Ang mga kandidato aduna lamang 13 ka adlaw aron pagrehistro sa Comelec. Kinahanglan lamang magdala sila og 1.5 x 1.5 nga hulagway nila ug documentary stamp alang sa registration.
Hinuon, gi klaro ni Labaria nga wala pay pagpangampanya nga mahitabo sa Biyernes tungod kay ang campaign period magsugod pa sa Oktubre 14. Mahuman kini sa Oktubre 23, duha ka adlaw sa dili pa ang adlaw sa piniliay. Ang mga kandidato gitugotan lamang paggasto og P3.00 matag botante. (PIA-Bohol)
