MANILA, Jan. 22, 2014 (PIA)–Kasamtangang gi-bawal una sa nasud ang pagpasulod og mga karne sa manok, piso, itlog ug mga domestic ug wild birds gikan sa nasud sa China tungod sa hulga sa bird flu.
Kini ang gipahibalo ni Agriculture Secretary Proceso Alcala human makumpirmar ang outbreak sa Highly Pathogenic Avian Influenza (HPAI) virus nga usa ka subtype sa H5N2 virus sa probinsiya sa Hebei sa China.
Apil usab niini ang mga pasaherong adunay dalang langgam, pato, manok ug uban pang poultry products.
Tungod sa gipatuman nga ban, gimandu dayon ni Alcala ang suspensyon sa pag-proseso, pag-evaluate ug pag-isyu sa aplikasyon ug apil na usab ang pagkumpiska sa mga barkong adunay kargang susama sa mga nahisgotang produkto gikan sa China, gawas sa heat-treated products.
Gi-alerto na usab karon sa Department of Agriculture (DA) ang tanan nilang veterinary quarantine officers o inspectors sa tanang pantalan sa nasud kalabot niini.
Apan gitataw ni Alcala nga “bird-flu free” pa gihapon ang Pilipinas. Iyang gipasabot nga dili magkulang ang suplay sa manok sa nasud tungod kay gikan man sa Amerika ug Canada nga walay kaso sa bird flu virus ang mga chicken parts nga gipasulod sa nasud ug dili gikan sa China. (PIA7-Bohol/ECB)
