TAGBILARAN CITY, Bohol, July 16 (PIA)–Subling nanawagan ang gobyerno sa Pilipinas sa nasud sa China nga mosunod sa gitawag nga ‘legal track’ alang sa kasulbaran sa territorial dispute sa parte sa West Philippine Sea.
Matud pa ni Department of Foreign Affairs (DFA) spokesperson Raul Hernandez, padayon nga giduso sa nasud ang kaso niini sa United Nations (UN) kalabot sa pag-angkon sa mga teritoryong sakop sa Pilipinas.
Gitumbok pa ni Hernandez nga gustong iduso sa Pilipinas ang ‘rule of law’ alang sa relasyon sa duha ka nasud mao nga nangayo na sila og pakitabang sa United Nations Convention on Law of the Sea (UNCLOS) alang sa arbitration proceedings.
Padayon usab ang pagpaningkamot sa DFA aron tukion sa gobyerno sa China ang maong hisgotanan. (PIA-Bohol/ecb)
Nahabiling 2 ‘annexes’ sa Bangsamoro framework agreement,
target nga mahuman sa dili pa matapos ang tuig
TAGBILARAN CITY, Bohol, July 16 (PIA)–Human magkauyon sa wealth sharing scheme ang gobyerno sa Pilipinas ug Moro Islamic Liberation Front (MILF), target nilang makumpleto ang duha pa ka annexes sa Bangsamoro framework agreement alang sa final deal sa dili pa matapos ang tuig.
Ang duha ka nahabiling annexes may kalabotan sa power sharing ug sa normalization.
Ang duha ka nahabiling annexes mao ang mga isyu nga angay maresolba sa gobyerno sa dili pa malagdaan ang formal peace pact.
Si Chief Government Negotiator Miriam Coronel-Ferrer nihulagway sa nauyunan nilang wealth sharing scheme negotiation nga “a close call,” apan human sa 6 ka adlaw nga panaghisgotay, apil na ang 12 ka oras nga meeting, ang duha ka partido nagkauyon ra gayud ug milagda sa kasabotan sa wala pa ang tungang gabii niadtong Sabado.
Samtang gihimakak usab ni Coronel-Ferrer nga ang pagladga sa wealth sharing agreement wala gidali alang sa nagsingabot nga State of the Nation (SONA) sa Presidente sa Hulyo 22.
(PIA-Bohol/ecb)
