MANILA, July 18 (PIA)–Bawal na karon ang pagsuroy-suroy, taas nga lunch break ug siesta sa tanang buhatan sa gobyerno, matud pa ni Presidente Rodrigo Duterte.
Sa iyang pahayag nga gipagawas sa Malakanyang, miingon si Duterte nga bayad na ang unang walo ka oras sa mga empleyado sa gobyerno mao nga wala sila’y katungod nga dili kini hutdon sa trabaho.
“Bayad tayo. So pag inindian mo ang tao, wala sa opisina mo…after lunch break nasa mga mall, nagpapasyal-pasyal, pag nangyari yan uli, dismissed ka”, matud pa sa Presidente.
Matud pa nga angay huna-hunaon kanunay sa mga nasudnon ug lokal nga kawani ug opisyal sa gobyerno nga gibayran sila sa katawhan aron motrabaho og walo ka oras.
Gawas sa pagkatangtang sa puwesto, giinong mahimong pasakaan og kaso ang mga kawani ug opisyal nga hilig muole og sayo o dili tiwason ang oras sa trabaho.
Giingong makonsiderar nga estafa o swindling ang ingon niining buhat nga nahisulod sa Article 8 sa Revised Penal Code.
Gimanduan na sa Presidente si Civil Service Commission (CSC) Chairperson Alicia Dela Rosa Bala nga tun-an og maayo ang polisiya sa gobyerno kalabot sa lunch break ug uban pang isyu nga may kalabotan sa oras sa trabaho sa mga kawani ug opisyal sa gobyerno. (ecb/PIA7-Bohol)
