MANILA, Feb. 05 (PIA)–Nipahimangno ang Department of Education (DepEd) nga walay pagabayaran ang mga estudyante sa early registration nga nagsugod niadtong Enero 30 alang sa academic school year 2016-2017.
Matud pa ni DepEd Assistant Secretary Tonisito Umali, kinahanglan lamang dalhon sa mga ginikanan o estudyante ang ilang mga birth certificate alang sa mga mosulod sa kindergarten ug report card usab alang sa mga mosulod sa Grade 1.
Subling gi-awhag ni Umali ang mga ginikanan nga adunay anak nga naa sa 5 taman 6 anyos nga mosalmot sa early registration campaign sa ahensiya.
Gipasabot ni Umali nga tuyo sa maong programa nga mahibaw-an kun pila ka bata ang mosulod sa usa ka tunghaan, pila ka magtutudlo ang kinahanglanon ug unsang materyales ug pasilidad ang gamiton aron sayo kining mapangandaman sa DepEd.
Matapos ang early registration sa Pebrero 29, 2016. (ecb/PIA7-Bohol)
