Ang tanang lakang sa gobyerno sa pakig-dayalogo sa MILF og lain pang mga rebeldeng grupo aron makab-ot ang kalinaw maga sentro na karon sa gitawag ug DDR kon disarmament, demobilization og rehabilitation. Mao kini ang mando ni Pangulong Gloria Macapagal-Arroyo matud pa ni defense secretary Teodoro Gilberto human sa gipahigayong tigum sa National Security Council kagahapong adlawa.
“Inubanan sa halapad nga paghimo og konsultasyon sa mga lokal nga komunidad, ang DDR kon disarmament, demobilization og rehabilitation mao na ang unang basehan usa ang Kagamhanan molingkod pag usab sa peace negotiating table”, ang kalihim sa depensa mibutyag.
Matud pa ni Teodoro “ipadayon gihapon ang pagtukis sa grupo ni Kumander Bravo og Umbra Kato bisan gasukod na ang Ramadhan. Kinahanglang ma disarmahan una ang mga sakop ni Bravo og Kato og ang pag surender sa duha aron manubag sa ilang mga nahimong kriminal nga buhat”.
Sa demobilisasyon, gidili sa Pangagamhanan ang mga sundalo sa MILF sa pagtapok aron makamugna og dagkong grupo , kini aron malikayan ang pagpahigayon og lain pang mga opensiba batok sa mga kasundaluhan og pagpangatake sa mga sibilyang komunidad.
Ang rehabilitasyon sa mga internally displaced persons (IDP) o mga bakwit nga mokabat na karon og labaw sa tres syentos mil (300,000) mao usab ang nag-unang gihatagan.
Si Lt. Gen. Cardozo Luna, ang AFP vice chief of staff nga kanhing 302nd brigade commander nga unang gabase sa Camp Rajah Sikatuna, Katipunan, Carmen midasun usab sa maong kondisyones sa Gobyerno diha sa pagpadayon sa panag-estoryahay sa Kagamhanan sa MILF og lain pang rebeldeng grupo.
Si Luna nga mao ang gitudlo nga commander sa Joint Task Force Mindanao, mipasalig nga bisan padayong ang pagtukis sa militar sa grupo ni Bravo og Kato ang mga kasundaluhan hugot nga manalipod sa katungod sa mga sibilyan og mopatuman sa rules of engagement. (30)
