MANILA, Oct. 14 (PIA)–Giseguro sa Malakanyang nga dili mohunong ang administrasyong Aquino nga tarungon ang sistema partikular na ang paggasto sa pondo sa katawhan.
Gipahayag kini ni Deputy Presidential Spokesperson Abigail Valte kalabot sa pinakaulahing resulta sa Social Weather Station (SWS) survey nga mi-ubos og 15 puntos ang satisfaction rating ni Presidente Benigno ‘Noynoy’ Aquino III sa buwan sa Setyembre.
Matud pa ni Valte, bisan nagpabilin ang taas nga kumpiyansa sa katawhan sa Presidente, kausa pa gihapon ang administrasyon sa kalagot sa publiko batok sa sayop nga paggamit sa pondo sa katawhan.
Sa 3rd quarter ning tuig, mikabat sa 68% sa mga Pilipino ang kuntento pa gihapon sa performance sa Presidente, samtang gi-ila usab sa Palasyo ang 13% nga ‘dissatisfied’.
Sa maong panahon man nibuto ang init nga isyo kalabot sa sayop nga paggamit sa Priority Development Assistance Fund (PDAF) sa dihang gipahigayon ang maong survey.
Gipasabot ni Valte nga dili gayud malikayan ang pagkadismaya sa publiko sa maong isyo.
Bisan pa niiini, gipasalamatan pa gihapon sa Palasyo ang publiko nga wala nagpadala sa mga sulsol sa pipila ka grupo aron idiskaril ang pagpatuman og reporma sa nasud. (ECB/PIA7-Bohol)
Purisima, gipasidunggan isip Emerging Markets Finance Minister of the Year
MANILA, Oct. 14 (PIA)–Gipasidunggan si Finance Secretary Cesar Purisima isip best Finance Minister of the Year in Asia sa Emerging Markets.
Ikaduhang higayon nang nakadawat niining pasidungog si Purisima diin nakadawat usab siya niini niadtong 2011.
Gipaambit ni Purisima ang maong award kang President Benigno Aquino, diin iyang gitumbok ang reporma niini sa good governance.
“I must make it clear that this award is not mine. The award recognizes things that were only made possible by President Aquino’s commitment to good governance, as well as his honesty, leadership, and astute use of political capital,” matud pa ni Purisima.
Si Purisima nakadawat usab sa Finance Minister of the Year award gikan sa Euromoney sa niaging tuig. (ECB/PIA7-Bohol)
