MANILA, July 27 (PIA)–Gi-awhag sa Malakanyang ang mga botante sa pagpa-rehistro sa ilang biometrics data sa Commission on Election (Comelec) aron magamit ang ilang katungod sa pagbotar sa umaabot nga nasudnong eleksiyon sa tuig 2016.
“Nananawagan po tayo sa ating mga kababayan na lumahok dito sa pagkuha ng biometric data para maging ganap ang ating pagiging registered voters para sa susunod na halalan,” pag-awhag ni Presidential Communications Operation Office (PCOO) Kalihim Herminio Coloma, Jr., sa usa ka pakighinabi sa dzRB Radyo ng Bayan.
Matud pa ni Coloma nga ang pagbotar usa ka mahinungdanong kaakohan sa matag lungsoranon.
Dugang pa sa Kalihim, matag piniliay gihatagan kita og kahigayonan nga ipadayag ang atong gibati ug mopili sa mga kandidatong angay saligan nga mamuno sa atong nasud.
Matud pa sa Comelec, adunay 3,893,095 pa ka botante ang kinahanglang magpa-biometrics sukad Hunyo 30, 2015.
Mipasidaan ang Comelec nga kun mapakyas ang usa ka botante sa pagpa-validate sa iyang biometrics, mahimong ma-deactivate o mawala ang iyang records diin nagpasabot nga dili kini maka-botar sa sunod tuig. (ecb/PIA7-Bohol)
