MANILA, Mar. 04 (PIA)–Gipagawas sa Malakanyang ang detalye kun asa naadto ang pondo alang sa mga biktima sa bagyong Yolanda niadtong tuig 2013.
Sa pagpasabot ni Presidential Communications Operations Office (PCOO) Kalihim Herminio “Sonny” Coloma Jr., gikan sa record sa Foreign Aid Transparency Hub, ang Pilipinas nakadawat og kinatibuk-ang $386.2 milyong dolyar nga foreign aid diin 86 porsiyento niini o kinatibuk-ang $330.8 milyon ang nadawat sa non-government organizations (NGOs), multilateral agencies ug uban pa.
Matud pa ni Coloma nga gikan sa maong kinatibuk-ang kantidad, mga $26.9 milyon nga cash ug $28.5 milyon nga non-cash nga donasyon ang nadawat sa nasudnong kagamhanan.
Giseguro hinuon ni Coloma nga ang tanang donasyong naadto sa mga komunidad nga naapektuhan sa bagyo sa Kabisay-an, ilabi na sa Eastern Visayas nga rehiyon.
“All foreign aid received by the country for the benefit of the communities affected by super typhoon ‘Yolanda’ are fully accounted for and have undergone the requisite audit by the Commission on Audit (COA),” pagsiguro ni Coloma.
Ang Malakanyang mipagawas sa maong detalye sa pondo alang sa mga biktima sa bagyong Yolanda human kini gipangita ni Davao City Mayor Rodrigo Duterte. (ecb/PIA7-Bohol)
