TAGBILARAN CITY, Bohol, Feb. 11 (PIA)–Giseguro sa Malakanyang nga padayon ang gobyerno sa paghimo og mga lakang aron makamugna og daghang trabaho alang sa mga Pilipino dinhi sa nasud aron makab-ot ang inclusive growth.
Taliwala kini sa gipagawas nga taho sa Social Weather Stations (SWS) nga nag-ingong nagpabiling taas ang gidaghanon sa mga Pilipinong walay trabaho base sa survey nga ilang gipahigayon sa ika-upat nga kwarter sa 2013 diin nigawas nga halos naa sa 27.5% o kapin 12 milyong indibidwal ang walay trabaho.
Sa gipahigayong press briefing sa Malakanyang kagahapon, miingon si Presidential Spokesperson Sec. Edwin Lacierda nga nisaka ngadto sa 6 ka puntos kun itandi sa niagi ang resulta sa maong survey.
Kini tungod na usab sa kadaot nga nahiagoman sa nasud sa mga milabay nga kalamidad ilabi na sa pagpanghasi sa bagyong Yolanda sa Kabisay-an.
Dugang pa sa tigpamaba sa Presidente, tungod na usab kini sa mga nangagubang establisyemento nga naka-ingon sa pagtak-op sa mga negosyo nga ni resulta sa daghang nawad-an og trabaho.
Apan bisan pa niini, dungan sa pagmando ni Presidente Aquino sa Department of Labor and Employment (DOLE), giseguro sa gobyerno nga may igong programa kini aron tabangan ang mga walay trabaho sa nasud sama sa cash-for-work program ug paggahin og mga bag-ong trabaho sa mga nakalampos ubos sa mga job fairs aron matubag ang panginahanglan sa matag pamilya. (PIA7-Bohol/ECB)
