MANILA, April 28, 2014 (PIA)–Subling giseguro karon sa Malakanyang nga protektado ang interes sa Pilipinas sa gilagdaang Enhanced Defense Cooperation Agreement (EDCA) kauban ang Estados Unidos.
Matud pa ni Presidential Communications Operations Office (PCOO) Secretary Sonny Coloma, makuting gipabantayan ni Presidente Benigno “Noynoy” Aquino III sa Philippine panel ang matag probisyong gi-mugna sa EDCA.
Dugang pa sa kalihim, dakung butang kini sa pagpalig-on sa relasyon sa Pilipinas ug Estados Unidos, partikular sa gipaabot nga suporta sa giatubang nga tensyon sa China kalabot sa territorial dispute sa West Philippine Sea.
Nahisulod niining kasabotan ang mas luag nga pagsulod sa US Forces o increased rotational presence sa Pilipinas apan gitataw ni US Ambassador to the Philippines Philip Goldberg nga dili buksan pagbalik ang mga US military bases sa nasud tungod sa EDCA. (PIA7-Bohol/ECB)
