MAY pagtugot na sa Malakanyang ang laraw sa mga abogado sa nasud nga mopasaka’g kaso batok sa mga ahensya sa kagamhanan nga milapas sa mga balaod alang sa kalikopan.
Si Cabinet Secretary Silvestre Bello III mibungat nga kon may legal nga basehan ang mga abogado nga pasakaag sumbong ang mga ahensya, dili magpugong ang Palasyo.
Gipasabot niya nga mismo si Presidente Gloria Macapagal Arroyo, migahin na sa matag Biyernes alang sa pagtubag sa mga environmental concerns, ug kini maoy iyang rason nganong mouyon ang Presidente sa laraw sa mga abogado.
Hinuon, wala ikabutyag kon unsa ang matang sa mga kaso ug kon kini may kalabutan ba sa pagpasagad sa mga local nga kagamhanan sa paghatag og mga pagtugot sa pagtukod ug imprastraktura nga misa-oy na sa public access zones. (rachiu/PIA)
