TAGBILARAN CITY, Bohol, April 24 (PIA)–Gitumbok sa Malakanyang nga may mga gihimo kining mga pamaagi aron masolbad ang kakabus sa nasud.
Pahayag kini sa Palasyo human sa pag-angkon sa National Statistical Coordination Board nga halos wala nakuhai ang gidaghanon sa mga kabus sa nasud.
Base sa taho sa ahensya, nalansang sa 27.9% ang poverty incidence sa unang parte sa 2012 kun itandi niadtong 2006 ug 2009.
Giingong nagpasabot kini nga 28 sa matag 100 ka pamilyang Pinoy ang kabus.
Matud pa ni Deputy Presidential Spokesperson Abigail Valte, gipakita sa pagkusog sa stock market ang pagsalig sa mga negosyante sa pagpadagan sa gobyerno karon nga makamugna og dugang trabaho.
Si Valte nagkanayon nga dugang pa niini ang mga programa sa gobyerno alang sa mga kabus sama sa Conditional Cash Transfer Program (CCT). (PIA-Bohol/ecb/i-gg)
Comelec, gimanduan ang mga poll survey firms
nga ibutyag ang talaan sa ilang mga subscribers
TAGBILARAN CITY, Bohol, April 24 (PIA)–Gimanduan karon sa Commission on Elections (Comelec) ang mga survey firms nga ibutyag sa poll body ang mga nagpondo sa ilang mga gipagawas nga pagtuon sa political trend.
Base sa tulo ka pahina nga Comelec Resolution 9674, gi-obligar sa poll body ang SWS, Pulse Asia ug uban pang susama nga kompaniya nga ipagawas ang talaan sa ilang mga financier, aron matino ang taho nga gigamit kini sa mga kandidato aron makondisyon ang hunahuna sa publiko.
Apan gi-klaro ni Comelec Chairman Sixto Brillantes nga magpabiling sekreto ang unsa mang impormasyon sa mga kompaniyang nagpa-survey aron dili maapektuhan ang ilang trabaho.
“What is given to us will be kept in confidence,” pagsiguro ni Brillantes.
Kun mapakyas sa pagbutyag ang mga kompaniya, posible silang mag-atubang og kaso.
Una nang nagdumili ang SWS ug Pulse Asia nga hinganlan ang ilang mga subscribers. (PIA-Bohol/ecb/i-gg)
