TAGBILARAN CITY, Bohol, May 10 (PIA)–Giseguro karon sa Malacañang nga walay angay ikabalaka ang mga Chinese nationals sa pagbisita sa Pilipinas.
Reaksyon kini sa Palasyo sa travel advisory nga gipagawas sa Chinese embassy alang sa ilang mga lumolupyo nga mag-amping sa pagbiyahe sa nasud atubangan sa gitakdang pagsugod sa anti-China rally ugma.
Ang maong protesta nga gi-organisa sa nagkalain-laing grupo sa overseas Filipino workers (OFWs) sa tibuok kalibotan isip pagsupil sa pagpanghilabot sa China sa teritoryo sa Pilipinas particular na sa Scarborough Shoal.
Matud pa ni Presidential Spokesman Edwin Lacierda, malinawon nga nasud ang Pilipinas ug welcome ang bisan kinsang turista nga moduaw dinhi aron magbakasyon.
Dugang pa ni Lacierda nga walay angay ikabalaka sa standoff sa Panatag Shoal ug nagpabiling mahigalaon ang mga Pilipino.
Gitataw pa ni Lacierda nga, ‘it’s more fun in the Philippines’ mao nga walay angay kabalak-an sa Chinese travel advisory.
“We are a very peaceful country. We welcome any tourists whether you’re Chinese or American. They should not be concerned with the standoff that’s happening in Panatag Shoal. We have always been a friendly country and it’s more fun in the Philippines. So don’t worry about the travel advisory,” matud pa ni Lacierda. (PIA-Bohol/ecb)
Ph-China, nagpulong og balik kalabot sa Scarborough issue
TAGBILARAN CITY, Bohol, May 10 (PIA)–Giingong gipatawag og balik karong adlawa sa Department of Foreign Affairs (DFA) ang tinugyanan sa China aron ipadayon ang negosasyon sa katuyoang masulbad na ang halos usa ka buwan nga standoff sa Scarborough Shoal.
Matud pa sa tigpamaba sa DFA nga si Raul Hernandez, mag-atubang sa bilateral consultations ang mga tinugyanan sa Pilipinas ug si Chinese Ambassador Ma Keqing.
Una nang gipahayag ni Foreign Affairs Sec. Albert del Rosario nga bukas pa gihapon ang pultahan sa Pilipinas alang sa panagpulong ug diplomatikong paagi aron masulbad ang problema.
Bisan pa niini, gipahayag usab ni Asec. Hernandez nga padayon pa gihapon ang pagduol sa DFA sa international arbitration forum.
Katapusang nagpulong ang duha ka nasud niadtong Abril 16, apan naule lang sa wala ang maong panagkita sa duha ka bahan human parehong nagmagahi sa nagkadaiyang mga posisyon.
Niining milabay’ng adlaw, gipatawag usab sa China ang Philippine charges d’affaires sa Beijing aron tambagan nga i-atras sa Pilipinas ang naka-deploy nga mga barko sa shoal. (PIA-Bohol/ecb)
