KONGKRETO ug halapad nga plano aron sagubangon ang posibleng negatibo nga epekto sa napakyas nga pagtubos sa Amerika sa nagkahugno nga ekonomiya niini.
Kini ang mandu ni Presidente Gloria Macapagal-Arroyo ngadto sa iyang mga tigdumala sa ekonomiya, sa kahingawa nga maka-epekto kini sa nasud.
Kahinumduman nga gisalikway sa Ubos Balay Balaoranan sa Amerika ang laraw nga tubson ang mga nabangkarota pinaagi unta sa Emergency Economic Stabilization Act of 2008.
Pinaagi unta niini, mogasto ang Treasury Department ug $700 bilyones aron paliton ang mga kabtangan sa mga bangko sa Amerika nga napalukapa sa krisis nga mihasi sa tibuok kalibutan karon.
Hinuon, misalig sa Budget Secretary Rolando Andaya nga nakapangandam na ang Pilipinas sa ingon niining hulga human ipatuman ang pait nga mga reporma nga gani, nakapahagbong sa popularidad sa Pangulo nasud. (PIA/rachiu)
