Si Presidente Gloria Macapagal-Arroyo miawhag sa mga Pilipino sa Estados Unidos nga tabangan ang mga na-angol sa bagyong Frank nga mihatag ug kadaut sa Pilipinas niadtong Sabado.
Matud pa sa Presidente, nga daghan na kaayong natabang ang mga Pilipino sa Estados Unidos. Kada tuig adunay hinabang para sa mga tulungha-an, probinsya, mga lokal nga pundok ug pamunuan, mga “dental ug medical” nga tabang, ug uban pa.
“Karon, sa kadaut nga nadangat sa Bagyong Frank, maghina-ut ako nga tabangan usab ninyo ang mga nanga-angol, labina kadtong mga kabus ug nangihanglan”, dugang sa Presidente.
Nasaksihan sa kapin sa 600 ka mga “Filipino-Americans” kon gi-unsa pag-tigum sa Presidente ang National Disaster Coordinating Council (NDCC) pina-agi sa usa ka “tele-conference”. Kini nagpamatu-od, nga bisan ang presidente tua sa Estados Unidos para sa usa ka “diplomatic’ nga kalihukan, wala gihapon niya pasagdi ang padumala sa nasud, taliwa sa kadaut nga bunga sa Bagyong Frank.
Gimandu-an usab ni Presidente Arroyo ang tanang mga embahada nga abrihan ang ilang buhatan sa pagdawat sa bisan unsang donasyon para sa mga biktima. (PIA/Bohol)
