TAGBILARAN CITY, Bohol, April 24 (PIA)–Nakasulod ang Pilipinas sa Top 3 dive destinations sa tibuok kalibotan, matud pa sa resulta sa survey sa usa ka inila nga diving magazine sa Japan.
Gibotar sa mga subscriber sa Marine Diving Magazine ang Pilipinas, Maldives ug Palau isip world’s top three dive destinations, matud pa sa usa ka pahayag sa Department of Tourism (DOT).
Wala gibutyag sa DOT kun unsa ang eksaktong resulta sa maong survey apan ilang gibutyag nga nakasulod ang Pilipinas sa top five “Best Overseas Destinations” sukad tuig 2006 ug naapil usab sa top 10 “Dream Destinations.”
Nakuha pagbalik sa Blue Coral ang top award isip favorite dive operator sa 2012. Mao kini ang ika-lima nilang sunod-sunod nga pagkadaug niini. Nasulod usab ang Good Dive Shop sa top 10 sa susamang kategorya.
Gipagawas ang resulta sa botohan nga gihimo sa Marine Diving Fair 2012 sa Tokyo, Japan, niadtong Abril 6-8.
Mao kini ang labing dakung diving ug beach resort exhibitions sa Asya. Kapin sa 50,000 ka turista ug 200 ka exhibitors ang nisalmot niini gikan sa 50 ka nasud.
Kahinumdoman nga nasulod usab sa CNNGo ang Tubbataha Reef ug The Canyons sa Puerto Galera isip best dive sites in the world. (PIA-Bohol/ecb)
BOC, nimandu sa hugot nga pag-inspeksyon sa mga imported frozen meat sa nasud
TAGBILARAN CITY, Bohol, April 24 (PIA)–Taliwala sa hulga nga meat holiday sa mga hog ug poultry raisers, gimandu ni Bureau of Customs (BOC) Commissioner Ruffy Biazon ang hugot nga pagbantay sa mga imported frozen foods sa nasud.
Apil na niini ang pagsusi ug eksaminasyon sa tanang importasyon ug apil na usab ang rekord ug inventory tax sa 10 ka nag-unang mga food importers sa nasud.
Giingong pinaagi niini, makaseguro nga dili molapas sa aprobadong gidaghanon sa frozen meat ang gipasulod sa nasud ug kun adunay permit gikan sa Department of Agriculture (DA).
Kalabot niini, gipalihok usab ni Biazon ang intelligence group sa ahensya, ubos ni Deputy Commissiner Danilo Lim ug sa law enforcement nga ubos usab sa pagdumala ni Deputy Commissioner Horacio Suansing Jr. aron bantayan ang mga kargamento nga naa pa sulod sa mga refrigerated container vans sa maong buhatan. (PIA-Bohol/ecb)
