TAGBILARAN CITY, Bohol, Jan. 07 (PIA)–Nagpabilin ang baruganan ni Presidente Benigno “Noynoy” Aquino III batok sa pagbuhi sa death penalty.
Kahinomduman nga nabanhaw ang maong panawagan tungod sa sunod-sunod nga mga krimen diin labing ulahi ang masaker sa Cavite.
Matud pa ni Deputy Presidential Spokesperson Abigail Valte, wala nausab ang baruganan sa Presidente ug dili gayud kini uyon sa silot nga kamatayon.
Dugang pa ni Valte, nagtuo si Presidente Aquino nga ang pinaka-maayong solusyon mao ang pagsiguro sa pag-aresto ug pagpa-bilanggo sa mga kriminal.
Kun hapsay ang pagpatuman sa hustisya ug balaod, giingong magduha-duha ang usa ka kriminal nga nagplanong mohimo og krimen.
“The position of the President, as far as the death penalty is concerned, has not changed. He is not for the death penalty. Well, the position of the President always, when it comes to any form of crime, is (that) the effective deterrent of crime would be the knowledge that there will be certainty of punishment,” matud pa ni Valte. (PIA-Bohol/ecb/I-gg)
Ph stock exchange, nakab-ot na ang 6000-mark
TAGBILARAN CITY, Bohol, Jan. 07 (PIA)–Sa katapusan, nakab-ot na gayud ang gitinguha nga 6000-mark sa Philippines Stocks Exchange index (PSEi) karong buntag.
Ganinang alas-9:44 sa buntag dihang natala ang record-breaking high sa PSEi diin giingong tungod kini sa liquidity.
Una niini niadtong weekend, naglaum ang Malakanyang nga makab-ot na ang 6000-mark sa PSEi nga mas sayo ning tuiga.
Kini human natala niadtong Biyernes ang pinakabag-ong record-high sa stock market sa dihang nakab-ot ang 5,907 usa nisarado ang trading.
Matud pa ni Deputy Presidential Spokesperson Abigail Valte, nakatutok sila sa trading sa pagsulod sa bag-ong tuig tungod kay dugay na nilang target ang 6000-mark sa PSEi.
Dugang pa ni Valte, nanghinaut sila nga madugangan pa ang mga “good news” sama sa “slowest inflation rate” sukad 2008 nga natala sa 2012.
Giingong mabati kini sa umaabot nga mga adlaw ilabi na sa presyo sa mga panaliton ug bayad sa konsumo o mga serbisyo. (PIA-Bohol/ecb/I-ed)
