TAGBILARAN CITY, Bohol, Oct. 16 (PIA)–Gipangunahan ni Presidente Benigno ‘Noynoy’ Aquino III ang pagpanghatag og tabang sa mga biktima sa linog sa Tagbilaran Sports Complex ganinang buntag human sa aerial tour niini aron makita ang mga dapit nga grabeng naigo sa 7.2 magnitude nga linog nga miigo kagahapon sa lalawigan sa Bohol ug ubang dapit sa Visayas.
Gipahibalo sa Department of Social Welfare and Development (DSWD) nga kapin sa 5,000 ka pamilya ang naapektuhan sa linog ug nagpadala na sila og pagkaon ug mga tolda aron kasamtangang magamit sa mga biktima.
Matud pa ni DSWD Secretary Dinky Soliman, pagadalhon sa iyang buhatan ang mga wala na gigamit nga tolda sa lungsod sa Zamboanga aron magamit sa mga Bol-anon.
Dugang pa ni Soliman, usa ka C-130 cargo plane sa Philippine Air Force (AFP) ang gigamit aron mahatud ang 2,000 food packs sa DSWD sa pakigtambayayong sa National Disaster Risk Reduction and Management Council (NDRRMC) sa Bohol.
Gawas sa food packs, 38 ka trapal usab ang gihatud aron magamit sa mga biktima sa linog.
Aron usab matubag ang panginahanglan sa maayong panglawas sa mga Bol-anon, gibutyag sa Kalihim nga ang Department of Health (DoH) magdala dili lamang mga tambal apan apil na sa mga gamit nga gikinahanglan aron matambalan ang mga naangol na dili kayang matambalan sa mga ospital sa lalawigan sa Bohol.
Giseguro sa Presidente nga ang iyang administrasyon andam kanunay nga motabang sa mga dapit nga apektado sa mga kalamidad ug adunay igahin ang kagamhanan niini.
Kauban sa Presidente sa pag-abot dinhi sa lalawigan sa Bohol sila Sec. Rogelio Singson sa Department of Public Works and Highways (DPWH), Sec. Jose Rene Almendras sa Department of Energy (DOE), Sec. Voltaire Gazmin sa Department of National Defense (DND), Sec. Joseph Emilio Abaya sa Department of Transportation and Communication (DOTC), Sec. Dinky Soliman sa DSWD ug Sec. Ramon Carandang sa Presidential Communications Development and Strategic Planning Office (PCDSPO).
Human sa pagpanghatag og tabang sa mga biktima sa linog, gisusi usab sa Presidente ang pantalan sa syudad sa Tagbilaran nga matud pa sa mga opisyal, kinahanglan ang P500 milyon aron mapaayo kini.
Sa kasamtangan, magamit pa ang pantalan apan dili mahimo sa mga dagkung cargo. (PIA7-Bohol/ECB)
