TAGBILARAN CITY, Mar. 03 (PIA)–Gipangunahan ni Presidente Benigno ‘Noynoy’ Aquino III ang seremonya sa pagpasiga sa mga sityo sa tulo ka lalawigan sa Rehiyon 7 kagahapon.
Ubos sa Sitio Electrification Program sa Rehiyon 7, 2,684 ka sityo ang napasiga na gikan Oktubre 2011 hangtud Enero 2016, nga may kinatibuk-ang 31,253 inisyal nga household connections.
“Ngayong araw nga po, nasaksihan na natin ang seremonyal na pagpapailaw ng 2,684 na sitio dito sa Central Visayas sa ilalim ng Sitio Electrification Program na pinangunahan ng DOE, ng NEA, at nagawa sa tulong ng ating mga electric cooperatives. Maraming salamat po sa kanilang lahat,” matud pa sa pahayag ni PNoy.
Ang napasug-an nga mga sityo naglakip sa 469 sa lalawigan sa Bohol, 2,097 sa lalawigan sa Sugbo ug 118 sa lalawigan sa Siquijor.
Base sa maong electrification program, 7 ka electric cooperatives ang mag-supply og kuryente sa Bohol, Cebu ug Siquijor alang sa pagpalambo sa ekonomiya ug turismo sa rehiyon.
Sa iyang diskurso didto sa Barangay Lourdes sa Panglao kagahapon, miingon ang Presidente nga 100 porsiyento nang adunay kuryente ang Bohol.
Matud pa sa Presidente nga ang gobyerno nakapasiga na sa 32,026 ka sityo sa tibuok nasod nga may 98.72 percent completion rate.
“Bago nga raw po matapos ang Marso, matatapos na ang lahat ng natukoy sa ating imbentaryo. Marso pong kasalukuyan iyan, hindi 2017,” matud pa ni PNoy.
Nitambong usab sa maong seremonya sila Department of Energy (DOE) Kalihim Zenaida Monsada, Department of Transportation and Communication (DOTC) Kalihim Joseph Emilio Abaya, Bohol Gob. Edgardo Chatto ug Bohol Rep. Rene Relampagos.
Si Chatto mipadayag sa iyang dakung pasalamat sa Presidente alang sa Sitio Electrification Program, Pantawid Pamilyang Pilipino Program, Bottom-up Budgeting ug sa New Panglao Airport. (ecb/PIA7-Bohol)
