TAGBILARAN CITY, Bohol, Jan. 30 (PIA)–GITUMBOK ni Presidente Benigno “Noynoy” Aquino III nga may limitasyon ang matag katungod sa tawo sama sa freedom of speech.
Atubangan kini sa gipahamtang nga ‘guilty’ kang Carlos Celdran nga may silot nga duha ka buwan nga pagkabilanggo tungod sa pag-rally sulod mismo sa simbahan.
Matud pa ni Presidente Aquino, angay ikonsiderar ang angay isulti ug kun unsaon kini pagpadayag kalabot sa usa ka hisgotanan.
Dugang pa sa Presidente, nakisimpatiya siya sa posisyon ni Celdran sa RH Bill, apan dili siya pabor sa iyang pamaagi sa pagpadayag.
Apan nanghinaot usab ang Presidente nga pasayluon na lamang sa simbahan si Celdran ug makapag-move on na gikan sa maong panghitabo.
“Well, I may sympathize with Mr. Celdran’s position. Perhaps ‘yong methodology during a mass baka we don’t agree with it. At the same time, siguro kung tutularan ‘nung ating kaparian, ating mga religious, ‘yong ehemplo mismo ng (Santo) Papa at maraming (Santo) Papa, palagay ko lalabas naman ‘yong Christian generosity and charity at baka naman mapatawad naman nila si Ginoong Celdran para naman, ‘di ba, puwede na tayong umusad mula doon sa panahon na ‘yon,” matud pa ni Presidente Aquino. (PIA-Bohol/ebc/p-gg)
Comelec, nipasidaan batok sa peke nga gun ban exemption permit
TAGBILARAN CITY, Bohol, Jan. 30 (PIA)–NIPASIDAAN ang Commission on Elections (Comelec) batok sa giingong pagkuyanap sa mga pekeng gun ban exemption permits nga mapalit sa kantidad nga P1,200.
Matud pa ni Comelec Commissionner Elias Yusoph, chairman sa Committee on the Ban on Firearms and Security Personnel, may niabot sa iyang impormasyon kalabot sa exemption permits nga nagdala sa iyang lagda.
Gitataw niini nga sa orihinal nga permit, dili lamang siya ang nakalagda, apan apil na silang Chief Superintendent Miguel Antonio Jr. sa Philippine National Police (PNP) ug General Rodelio Santos sa Armed Forces of the Philippines (AFP).
Migamit usab ang Comelec og security paper nga adunay watermark sa komisyon.
Pasidaan pa ni Yusoph, pasakaan og kaso nga falsification of public document ang bisan kinsang masakpan nga nagkupot sa pekeng gun ban exemption permit ug mahimong mabilanggo og unom hangtud 12 ka tuig. (PIA-Bohol/ecb/i-gg)
