TAGBILARAN CITY, Bohol, Aug. 02 (PIA)–Giseguro ni Presidente Benigno “Noynoy” Aquino III nga mapasug-an na ang tibuok 36,000 ka sitio sa nasud nga walay kuryente sa dili pa matapos ang iyang termino sa 2016.
Sa pagtambong niya sa ika-33 nga Annual Assembly sa Philippine Rural Electric Cooperatives Association, Inc. (PHILRECA) sa Philippine Trade Training Center sa syudad sa Pasay, gipasigarbo ni PNoy nga sulod sa iyang duha ka tuig nga pangatungdanan, napasug-an na niya ang 2,400 ka sitio sa tibuok nasud.
Giingong target niyang mapasug-an ang 6,700 ka sitio sa dili pa matapos ang 2012.
Sa iyang pahayag, gipasalamatan sa Presidente si Energy Secretary Rene Almendras ug ang mga electric cooperative sa mga lakang niini aron mapahatud ang kuryente sa pinakasuok nga dapit sa nasud.
Naglaum usab ang Presidente nga mapalabang na ang National Electrification Administration Reform Bill nga nagtinguhang hingusgan pa ang National Electrification Administration (NEA) charter ug malikayan ang pulitika sa mga electric cooperative. (PIA-Bohol/ecb)
Interest rate sa calamity loan, gikunhoran sa Pag-ibig
TAGBILARAN CITY, Bohol, Aug. 02 (PIA)–Gikunhoran sa Pag-IBIG Fund ang interest rate sa calamity loans sa mga miyembro niini aron matabangan ang mga pamilyang naapektuhan sa bagyo ug uban pang kalamidad.
Matud pa ni Vice President Jejomar Binay, gikunhoran sa 5.95% na lamang ang interes sa calamity loan sa Pag-IBIG gikan sa kanhi 10.75%.
“We intend to help ease the burdens of our kababayans living in typhoon-prone areas and those hit by other natural calamities,” pahayag ni Binay, chairman of the board sa Pag-IBIG.
Gawas pa niini, nagtanyag usab ang Pag-IBIG og tulo ka buwang moratorium sa pagbayad sa housing loan payments alang sa mga miyembrong apektado sa kalamidad. (PIA-Bohol/ecb)
