TAGBILARAN CITY, Bohol, Oct. 18 (PIA)–Gimanduan ni Presidente Benigno ‘Noynoy’ Aquino III ang iyang gabinete nga dili gayud talikdan ang mga Bol-anon niining labing kritikal nga panahon human sa 7.2 magnitude nga linog nga nitay-og sa lalawigan niadtong Oktubre 15.
Ang mando sa Presidente nga ‘walang iwanan’ gipadangat ni Department of Interior and Local Government (DILG) Sec. Mar Roxas atol sa iyang pagtambong sa senimanang programa nga “Kita Og Ang Gobernador” ganinang buntag didto sa People’s Mansion.
Gipadangat usab ni Roxas, ang mando sa Presidente nga magpadala og upat ka helicopter dinhi sa lalawigan sa Bohol aron magamit aron daling mapaabot ang mga tabang sa mga dapit nga dili pa masulod og sakyanan tungod sa mga guba nga dalan.
Si Roxas nagkanayon nga nia na usab sila karon dinhi sa Bohol aron suportahan ang kahago sa mga Bol-anon pinaagi sa Kagamhanang Probinsiyal, Kagamhanan sa syudad sa Tagbilaran ug mga local government units.
Gipangunahan ni Bohol Gob. Edgar Chatto, nitambong usab sa maong programa sila Sec. Dinky Soliman sa Department of Social Welfare and Development (DSWD) ug Executive Secretary Edwin Lacierda, kinsa midasig sa mga Bol-anon nga magpakapalig-on taliwala sa dakung kalamidad.
Nanawagan si Gob. Chatto nga hugtan pa sa mga lider ug katawhan sa tibuok lalawigan ang paghiusa ug pagtinabangany ilabi na sa mga nabiktima sa linog.
Masaligon ang gobernador nga mobalik pagbarug ang Bohol gikan sa pagkahugno bisan pa sa mga daghang pagsuway
Gipasalamatan ni Gob. Chatto ang administrasyong Aquino sa padayong pagtubag sa panawagan sa labing dinaliang ayuda ug tabang nga molanat pa og igong panahon sama sa pagpabarug sa mga nangahagsa nga imprastraktura.
Gibutyag ni Gob. Chatto nga mikabat na sa 160 ang patay, 186 ang naangol ug 20 ang gipangita pa sa lalawigan sa Bohol sa may 6:38 ning buntag. (PIA7-Bohol/ECB)
