TAGBILARAN CITY, Bohol, Jan. 02 (PIA)–Panaghiusa ang panawagan ni Presidente Benigno “Noynoy” Aquino III sa katawhang Pilipino sa pagsulod sa tuig 2013.
“Ituloy lang natin ang bayanihan. Kapit-bisig tayong humakbang tungo sa maliwanag at masaganang kinabukasan ng ating bayan.”
Sa iyang mensahe sa pagsugat sa Bag-ong Tuig, gibalikan ni PNoy ang mga nasinati sa nasud sa tuig 2012.
Bisan daghan og pagsuway, daghan usab og kalampusan nga nakab-ot ang mga Pilipino, partikular na kalabot sa ekonomiya, edukasyon, kalinaw ug mga balaodnon.
“Ang taong 2012 ay parehong panahon ng pagsubok at tagumpay. May ilan mang lubak sa ating paglalakbay; may mga pilit mang humadlang sa ating mga positibong hakbang; nanaig pa rin ang adhika nating ituwid ang baluktot na sistema, at baguhin ang dinatnan nating kalagayan ng bansa.”
Aminado usab si PNoy nga mahimong kritikal usab ang pagsulod sa 2013 ilabi na nga apil sa babagan sa administrasyon ang pagpatuman sa mga napasar nga balaod, paghikyad og malungtarong kalinaw sa Mindanao ug ang eleksyon.
Kalabot niini, nanghinaot ang Presidente nga mas hingusgan pa sa katawhan ang pakighiusa paingon sa giingong tul-id na dalan ug mahimong magbinantayon sa mga bag-ong ibutang nga pango.
Naglaum usab si PNoy nga mas mahimo pang nindot ang tuig 2013 kun itandi sa mga nilabay nga tuig alang sa katawhang Pilipino. (PIA-Bohol/ecb/I-gg)
‘Gun ban’, ipatuman sugod Enero 2013
TAGBILARAN CITY, Bohol, Jan. 02 (PIA)–Hingpit nang ipatuman ang ‘gun ban’ sa nasud sugod sa Enero 13, 2013, isip pagpangandam sa 2013 May elections.
Ang maong gun ban base sa gipatuman nga Resolution 9561 sa Commission on Elections (Comelec) agig pagtamod sa Sections 32 ug 33 sa Omnibus Elections Code.
Sa ‘gun ban’, kanselado ang Permit to Carry, Mission Orders ug Acknowledgement Receipts sa mga armas.
Hingpit usab nga gi-dili ang pagpagawas og armas sa mga balay ug ang pagkuha og mga security personnel.
Mahimo lamang tugtan ang pag-import o pag-export sa mga armas kun aprubahan kini sa Committee on the Ban of Fire Arms and Security Personnel.
Ubos sa resolusyon, exempted sa ‘gun ban’ ang Armed Forces of the Philippines chief (AFP), Philippine National Police (PNP), National Bureau of Investigation (NBI), Bureau of Corrections, Bureau of Customs, Bureau of Imigration, Citizen Armed Force Geographical Unit (CAFGU) ug Presidential Security Group. (PIA-Bohol/ecb/I-sjp)
