TAGBILARAN CITY, Bohol, Jan. 15 (PIA)–Giseguro karon sa pamunuan sa Philippine National Police (PNP) nga andam na ang tanang mga PNP regional directors, provincial directors ug tanang units niini sa tibuok nasud nga bantayan ang mga private armed groups nga na-identify sa polisya.
Matud pa ni PNP chief director Gen. Alan Purisima, may gipagawas na siyang direktiba sa tanang kapolisan sa tibuok nasud aron dili maapektuhan ang nagsingabot nga 2013 midterm elections.
Kalabot niini, hangyo ni Purisima sa publiko nga makigtambayayong sa mga otoridad ilabi na sa mga nahitabo sa ilang lugar pinaagi sa pagpaabot sa impormasyon sa PNP hotline nga 0917-847-5757.
“Nakahanda po ‘yong ating provincial directors, regional directors na manmanan ang mga private armed groups na tinatawag, at kailangan po ‘yong impormasyon na manggagaling sa ating mga kababayan kung sino-sino at nasan ang mga grupong ito, upang mapigilan ang balak ng mga ito sa halalan. May hotline po tayo na maaaring i-text para sa inyong concerned: 09178475757.”
Kalabot niini, giseguro usab sa PNP chief nga tubagon nila dayon unsa mang lehitimong reklamo nga ipaabot sa ilang buhatan. (PIA-Bohol/ecb/I-gg)
Sayo nga pagpatala sa public elementary ug HS, sa Enero 26 na
TAGBILARAN CITY, Bohol, Jan. 15 (PIA)–Pagabuksan sa Department of Education (DepEd) ang nationwide early registration alang sa school year 2013-2014 sa tanang pampublikong elementarya ug sekondaryang eskwelahan sa Enero 26.
Matud pa ni Education Secretary Armin Luistro, kini aron masiguro ang universal participation ug completion of basic education nga target sa buhatan.
Nagtinguha ang DepEd nga makatungha og balik sa mga classroom ang school-aged children ug out- of- school youth.
“We are enlisting the assistance of local and barangay officials for the early registration of out-of-school children (OSC) and out-of-school youth (OSY), those with difficulty in learning and the indigenous peoples (IPs),” matud pa ni Luistro.
Partikular nga target sa sayo nga pagpatala ang tanang 5-anyos nga bata nga motungha sa Kindergarten ug tanang 6-anyos nga motungha usab sa Grade 1.
Target usab sa early registration ang OSC ug OSY, edad 5-anyos hangtud 18-anyos diin papilion sila sa matang sa sistema sa edukasyon nga gusto nila gikan sa alternative delivery mode (ADM) o alternative learning system (ALS). (PIA-Bohol/p-gg)
