MANILA, August 1 (PIA)–Mipasidaan ang pamunoan sa Philippine National Police (PNP) nga arestohon ang mga prank callers o mga mangilad sa bag-ong emergency hotline 911 sa gobyerno.
Matud pa ni PNP Chief Director Gen. Ronald “Bato” Dela Rosa, angay maghinay-hinay ang mga nag-planong mangilad sa maong emergency hotline tungod kay giingong dali kini nilang pangitaon.
Sa pagkakaron, gi-tracked na sa PNP ang 304 ka prank callers nga natala sa National Operation Center (NOC) sukad gibuksan ang maong hotline ganinang alas dose uno sa kadlawon.
Base sa gipahigayong monitoring sa NOC hangtud alas 7 ganinang buntag, nikabat na sa 2,475 ang natalang tawag, apan kadaghan mga dropped calls nga naa sa 1,119, samtang 75 lamang ang legitimate calls.
Pipila sa mga emergencies nga na-respondehan sa PNP, Bureau of Fire Protection (BFP) ug Department of Health (DOH) gikan sa mga nadawat nga tawag mao ang pagpadala og ambulansya, aksidente sa kadalanan, nanghasi, harassment, sumbong kalabot sa pagpayohot og ilegal nga droga ug riot.
Ganinang buntag, dungan sa ika-24 ka tuig nga anibersaryo sa PNP-Police Community Relations Group, gilusad ang 911 ug 8888 hotlines. (ecb/PIA7-Bohol)
