PNP, nihatag og mga safety tips alang sa
Adlaw sa mga Santos ug Kalag-kalag
MANILA, Oct. 30 (PIA)–May pipila ka pahinumdom ang Philippine National Police (PNP) aron magpabiling luwas karong Adlaw sa mga Santos ug Kalag-kalag atubangan sa giingong daghang mapahimoslanong grupo nga adunay nagka-daiyang modus operandi.
Matud pa sa PNP nga kun molakaw, siguradohon nga ikandado tanang mga pultahan ug bintana. Itugon sa kasaligang silingan ang balay nga walay nahabiling tawo. Siguradohon usab nga walay nahabiling nagsiga nga kandila, abli nga electric o gas stove, nagtulong gripo o nakasaksak nga appliances.
Kun mo-byahe gamit ang kaugalingong sakyanan, siguradohon gayud nga maayo ug naa sa kondisyon ang sakyanan ug kumpleto ang dalang dokumento ug papeles niini.
Kun mosakay sa mga pampublikong sakyanan, likayan ang pagsuot og mahalong alahas o magdala og dakung kantidad nga salapi. Angayan usab nga mosayo og adto sa mga terminal sa bus, pier o tugpahanan aron malikayan ang pagdasok sa mga pasahero.
Kun moadto na sa sementeryo, angay magdala og igong pagkaon ug tubig. Gitambag usab ang pagdala sa panagang sa init o ulan sama sa payong ug kapote. Angay usab nga bantayan og maayo ang mga dala nga gamit.
Kun may kuyog nga mga bata, bantayan kini og maayo ug dili pasagdan na lang.
Dili magdala og mga butang nga gi-bawal sa sementeryo sama sa armas, kutsilyo ug uban pang hinagiban. Gi-dili usab ang pagdala og mga baraha, ilimnong makahubog ug mga gamit nga makamugna og kasaba sama sa speaker.
Gipahinumdom usab sa PNP nga angay hibaw-an gayud ang lugar sa first aid station ug PNP assistance desk alang sa emergency.
Angay bantayan ang mga gamit nga gidala sa puntod ug siguradohon nga ang gisigahang mga kandila dili makaingon og sunog.
Kun may namatikdang kadudahang mga butang sama sa bagahe o kahon, ipahibalo dayon kini sa mga hingtungdan ilabi na sa kapolisan. (ecb/PIA7-Bohol)
