TAGBILARAN CITY, Bohol, Sept. 17 (PIA)–Nipasidaan ang Philippine Overseas Employment Administration (POEA) sa mga nakadawat og tanyag nga trabaho pinaagi sa internet.
Matud pa ni POEA Administrator Hans Leo Cacdac, angay susihon una kun nakarehistro sa
Ilang buhatan ang kumpanyang nagtanyag og trabaho. ug ang hiring pinaagi sa POEA-licensed recruiter.
“Not everything on email or the internet is to be believed,” matud pa ni Cacdac.
Gawas niini, mas maayo usab nga siguradohong sa lehitimong recruiter lamang makig-transaksyon.
Gitambagan ang publiko nga magbinantayon gayud kun makadawat og electronic mail o e-mail gikan sa public provider sama sa Yahoo ug Gmail ug kun mangayo og salapi ang nagtanyag og trabaho.
Tambag pa sa POEA sa mga nangita og trabaho nga dili dayon mosalig sa magpailang immigration consultants nga nagtanyag og visa coaching.
Mahimong makig-alayon sa embahada sa nasud ug sa mga labor attache o bisitahon lamang ang website sa POEA nga www.poea.gov.ph aron masiguro nga lehitimo gayud ang employer nga nagtanyag og trabaho. (PIA-Bohol/ecb)
DTI, may pahinomdom sa mga mopalit og Christmas lights
TAGBILARAN CITY, Bohol, Sept. 17 (PIA)–Gisugdan na sa Department of Trade and Industry (DTI) ang kampanya batok sa mga peke, depektibo ug sub-standard nga mga Christmas lights.
Subling gipahinomdoman sa DTI ang mga mamamalit nga likayan ang pagpalit og mga barato ug ubos nga klaseng Christmas lights nga maoy kasagarang hinungdan sa mga sunog.
Matud pa sa DTI, dili nila lum-an ang mga negosyante ug establisyemento nga molapas sa ilang patakaran partikular na ang pagbaligya og mga sub-standard nga Christmas lights nga walay Import Commodity Clearance (ICC) ug Philippine Standards (PS).
Mahibaw-an kun tinuod ug dili peke ang ICC ug PS mark kun kini naka-print ug nakatatak mismo sa produkto ug dili sa packaging niini.
Ubos sa Consumer’s Welfare Act, hugot nga gidili ang pagbaligya og mga pekeng produkto nga mahimong hinungdan sa aksidente. (PIA-Bohol/ecb)
