MANILA, Mar. 11 (PIA)–Nipatuman og temporary ban ang Philippine Overseas Employment Administration (POEA) sa pagpadala og mga overseas Filipino workers (OFW) nga gustong mo-trabaho sa Venezuela.
Kini tungod sa gi-isa sa Department of Foreign Affairs (DFA) nga crisis alert level 2 o restriction phase sa nasud tungod sa mga demonstrasyon didto aron palagputon sa pwesto ang nakalingkod nilang presidenteng si Nicolas Maduro.
Matud pa ni Department of Labor and Employment (DOLE) Secretary ug POEA governing board chairman Rosalinda Baldoz, gi-aprubahan na ang kasamtangang pagpahunong sa pagpadala og OFWs sa Venezuela tungod sa nagka-grabeng kagubot didto.
Gilagdaan ang resolusyon nila POEA Administrator ug vice-chair Hans Leo Cacdac ug sa mga miyembro sa board nga sila Feliz Oca, Estrelita Hizon ug Alexander Asuncion.
Samtang gipalikay sa DFA ang mga Pilipino sa Venezuela sa daghang mga tawo o kritikal nga lugar diin gipahigayon ang mga rally.
Gipaandam na usab ang mga Pilipino didto sa posibleng evacuation. (PIA7-Bohol/ECB)
