TAGBILARAN CITY, September 21 (PIA)–Dul-an 200 ang nitambong sa gipahigayong Power Patrol Seminar on Energy Efficiency and Conservation for Households kagahapon nga gipahigayon sa Metro Centre Hotel, ning syudad.
Gipangunahan sa Department of Energy (DOE) kauban sa Philippine Information Agency (PIA), ang maong kalihokan nahisubay sa kampanya sa pag-promote sa wais ug episyenteng paggamit sa elekrisidad sa panimalay, komersiyal ug sektor sa industriyal.
Gitambongan ang maong Power Patrol Seminar on Energy Efficiency and Conservation for Households sa mga miyembro sa Association of United Development Information Officers in Bohol (AUDIO-Bohol), mga pangulo sa Association of Barangay Captains (ABC) sa lalawigan sa Bohol, mga barangay kapitan sa syudad sa Tagbilaran, mga piniling school supervisors ug mga tinun-an sa Grade 9 ug Grade 10 sa Department of Education (DepEd) Bohol Division ug Tagbilaran City Division.
Si Tagbilaran City Mayor John Geesnell Yap II sa iyang welcome message nitumbok sa kamahinungdanon sa aktibong pagsalmot sa pagpa-usbaw sa kahibalo sa konsumidor ug magbinantayon sa pagpanalipod sa katungod sa mga konsumidor.
Si Marc Venson sa DOE Energy Efficiency and Conservation Division (EECD) ang nipasabot kalabot sa Magna Carta for Residential Electricity Consumers ug nihatag sa overview sa National Energy Efficiency and Conservation Program (NEECP) nga nagdetalye sa mga programa ug polisiya sa DOE kalabot sa pag-promote sa energy efficiency.
Samtang si Engr. Eulogio Signe, General Manager sa Bohol Light Company Inc. (BLCI) ang nipasabot kalabot sa “Understanding the Electric Bill” ug “How to Read the Electric Meter”.
Ang maong seminar gitambongan usab nila DOE-Visayas Field Office Director Antonio Labios, DOE OIC-Assistant Director Jesus Anunciacion ug PIA-7 Regional Director Minerva Newman.
Ang maong kalihokan nahisubay sa Executive Order No. 123 s. 1994, “Institutionalizing the Committee on Power Conservation and Demand Management.” (ecb/PIA7-Bohol)
