TAGBILARAN CITY, Bohol, Aug. 10 (PIA)–Giseguro karon sa Department of Trade and Industry (DTI) nga nagpabilin sa suggested retail price (SRP) ang presyo sa mga basic commodities ug igo ang supply sa mga nag-unang panginahanglan sa katawhan bisan gipatuman ang “price freeze” tungod sa gideklarang state of calamity.
Sa gipahigayong price monitoring ni DTI Secretary Gregory Domingo sa nagkalain-laing grocery stores sa Manila sa mga presyo sa mga nag-unang panaliton, nagpabiling stable gawas lamang sa mga presyo sa utan ug isda tungod sa dautang panahon.
Matud pa sa Kalihim, giingong nihatag na og pasalig ang mga tag-iya sa nagkalin-laing supermarkets, wet markets ug mga major manufacturers sa mga nag-unang panaliton nga adunay igong supply ug dili angay mag-panic buying ang mga katawhan.
Dugang pa ni Domingo nga ang mga nataho nga kakulang sa supply sa mga sardinas ug instant noodles tungod sa binultong pagpalit niining mga produktoha alang sa relief operations. (PIA-Bohol/ecb)
Visayas, ulanon sa bag-ong low pressure
TAGBILARAN CITY, Bohol, Aug. 10 (PIA)–Giingong posibleng mosulod na sa Philippine area of responsibility sa Lunes ang gibantayang low pressure area (LPA) sa sidlakang bahin sa nasud.
Matud pa ni Pagasa forecaster Ricky Fabregas, daku ang posibilidad nga maapektuhan sa LPA ang sidlakang bahin sa Visayas ug madugangan pa kini sa epekto sa southwest moonsoon o habagat.
Kung mahimong bagyo ang maong weather disturbance, hinganlan kini og bagyong Helen.
Samtang mipatuman na usab og thunderstorm watch ug uban pang alerto ang Pagasa alang sa mas epektibong public awareness.
Matud pa sa Pagasa, ang maong alerto lahi pa sa rainfall alert ug typhoon signal warning aron mahibaw-an sa publiko ang mas espesipikong kahimtang sa panahon nga angay nilang tutukan.
Miingon pa usab si Pagasa Administrator Nathaniel Servando nga gihimo na nila ang mga innovation karon alang sa mas tin-aw nga pasidaan gikan sa mga opisyal sa gobyerno nga magdeklarar og kanselasyon sa mga buhatan ngadto na sa yanong katawhan. (PIA-Bohol/ecb)
