TAGBILARAN CITY, Bohol, July 12 (PIA)–Mo-ubos ang presyo sa sardinas sa Agosto.
Kini ang gikumpirmar ni Trade and Industry Secretary Gregory Domingo human sa ilang National Price Coordinating Council (NPCC) meeting sa miaging adlaw.
Giingong sa kasamtangang kapin sa P13 matag gamay nga lata sa sardinas, mo-ubos na kini sa P12.80.
Matud pa sa kalihim, gi-base ang bag-ong presyuhan sa taho sa Bureau of Fisheries and Aquatic Resources(BFAR) nga maayo na ang suplay sa isdang tamban.
Giingong mikunhod na usab sa P22 ang presyo matag kilo niini gikan sa kanhi P30.
Gipahinumdoman usab ni Domingo ang mga retailers nga molapas sa gitakdang presyo nga may tukmang reklamo silang ipasaka batok kanila.
Samtang miingon usab ang kalihim nga stable ang presyo sa mga nag-unang panaliton sa milabay nga mga adlaw. (PIA-Bohol/ecb)
DTI, nipasidaan sa mga tindahang mag-overprice sa asukal
TAGBILARAN CITY, Bohol, July 12 (PIA)–Nipasidaan ang Department of Trade and Industry (DTI) sa mga establisyimentong magbaligya og mas mahal sa P50 nga suggested retail price (SRP) sa matag kilo sa asukal.
Nihatag sa maong pasidaan si DTI Secretary Gregory Domingo human ang National Price Coordinating Council meeting nila niadtong miaging adlaw.
Matud pa ni Domingo, mihirit pa unta ang mga naa sa sugar industry nga isaka pa ngadto sa P52.00 ang matag kilo sa asukal sa rason nga kulang na kini sa suplay.
Apan wala kini gitugotan sa DTI human nahibaw-an nga may igo pang suplay.
Gawas sa pagpasabot, posibleng pasakaan usab sa DTI og reklamo ang molapas nga establisimyento kun mapamatud-an nga may pagkulang niini. (PIA-Bohol/ecb)
