TAGBILARAN CITY, May 30 (PIA)–Gi-awhag sa Malakanyang ang tanang Pilipino sa pag-display sa bandila sa Pilipinas sa tanang mga opisina, ahensya, business establishments, tunghaan ug bisan ang mga pribadong balay gikan karong adlawa, Mayo 28 hangtud Hunyo 12.
Kini isip pagtimaan sa National Flag Days nga gi-deklarar kaniadto ni kanhi Presidente Fidel V. Ramos.
Niadtong Mayo 28, 1898 unang gihiklad ang bandila sa Pilipinas sa dihang napildi sa mga sundalong rebolusyonaryo ang pwersa sa mga Kastila sa Battle of Alapan sa Imus Cavite.
Sa maong adlaw usab wala pa pormal nga gipagawas sa publiko ang pag-anunsyo sa nasudnong bandila ug una kining pormal nga gipahibalo sa publiko niadtong Hunyo 12, 1898.
Sukad 1919 hangtud 1940, matag Oktubre kini gitimaan apan sugod niadtong tuig 1941, gihimo na kining Hunyo 12 diin una kining gihiklad sa Kawit.
Apan sa proklamasyon usab ni kanhi Presidente Diosdado Macapagal, gibalik sa Mayo 28 ang National Flag Day.
Niadtong Mayo 23, 1994, nagpagawas og Executive Order si Ramos nga gipatas-an ang pagtimaan sa National Flag Days gikan Mayo 28 hangtud Hunyo 12 nga gisunod pa gihapon hangtud karon. (ecb/PIA7-Bohol)
